Mudane Xasan Tuke oo ka mid ah masuuliyiinta ururka TODAY ee qabanqaabiya cayaaraha xagaaga ee lagu magacaabo Somali Week kana dhaca magaalada Tronto ee dalka Canada isla markaana ururka u qaabilsan dhinaca xiriirka dibadda iyo soo dhaweeynta marti sharafta ayaa wuxuu maalmahanba socdaal ku marayey dalal Yurub ah oo ay ka mid yihiin  UK , Sweden iyo Norway.

Xasan Tuke ayaa safarkiisan wuxuu ku saabsanaa sidii uu kooxaha iyo ururada ka dhisan dalalka Yurub qaarkood ugala hadli lahaa wajiga cusub ee uu ururka TODAY u qabanqaabin doono cayaaraha xagaaga sanadka 2008 iyadoo uu ururku wado qorshe ballaaran oo ku saabsan sidii cayaaraha Tronto loo sii hormarin lahaa iyadoo la isku dheeli tiri doono tirada kooxaha ka yimaada North Ameerika iyo kuwa ka yimaada Yururb isla markaana kooxaha Yururb ay wadan walba ka timaado koox ku cayaareeysa magaca dalkaa si uu tartanku u noqdo mid global ah.

Dalka Canada gaar ahaan magaalada Tronto ayaa iyadu ah hooyadii cayaaraha xagaaga ee Soomalidu isku aragto sanadwalba iyadoo Trontana ay tahay meeshii ugu horeeysay ee cayaarahan laga aasaaso.

Mudane Tuke ayaa intii uu ku sugnaa magaalada London wuxuu kulamo la qaatay qaar ka tirsan cayaartooydii hore ee Soomaliya iyo waliba maamulada kooxaha qaarkood waxaana ka mid ahaa dadkaa Maxamed Ismaaciil ,Axmed Nuur Seygarushka , Biriq , Daahir Gacameey , Maxamed Buube , Shiino Guhaad , Hassan Joon ,Amxmed Sheel , Isoomareey iyo dad kale oo fara badan oo halkan lagu soo koobi karin.

Xasan Tuke ayaa sidoo kale mar uu booqasho ku tagay dalka Norway wuxuu la kulmay  dhamaan cayaartooyda , iyo maamulada kooxaha iyo waliba madaxa kubadda cagta Norway halkaas oo uu wadahadlo ka dib heshiisyo iyo ballamo adadag la soo galay maamulada kooxahaa wuxuuna ku adkeeyey kooxahaa ineey diyaargaroow adag u galaan cayaaraha xagaaga ee Tronto 2008.

Sidoo kale mudane Xasan Tuke wuxuu socdaal kuwaa hore la mid ah ku yimid dalka Sweden isagoo halkaana kulan kula qaatay masuuliyiinta ururka SEUKI iyagoo ka wada hadlay sidii loo sameeyn lahaa wada shaqeeyn buuxda oo dhexmarta SEUKI iyo TODAY iyo sidii sanadkan cayaaraha SEUKI 2008 loo heli lahaa koox adag oo magaca Canada ku cayaareeysa kooxdaa oo Xasan Tuke ballan qaaday inuu keeni doono insha allah.

Mudane Xasan Tuke ayaa wuxuu rajo wanaagsan ka muujiyey inuu soo afjarmo qilaafka u dhaxeeya bahweynta Sportiga Tronto sidoo kale wuxuu reer Sweden u rajeeyey ineey hal meel wax iskugu keenaan si loo gaaro quruxda iyo sharafka Sportiga.

Garaad Salaad Xirsi

garaadcadde@hotmail.com