Haddii aynu dib u jalleecno cayaarta kubadda cagta, ayaa iyadu cayaarihii semifinalka oo la ciyaaray maalinimadii July3rd, 2009, waxaa isku haleelay kooxaha  Sandiego iyo Cedar Stars. Ciyaartaasi oo ahayd mid aad u xiiso badnayd ayaa muddadii ay socotay waxaa 3 gool iyo 1 ku adkaaday kooxda Sandiego oo galabtaasi soo bandhigtay cayaar aad u xiiso badnayd, inkasta oo kooxda Cedar Stars ay iska khasaariyeen fursado goolal loo fishay. Ciyaartii labaad ee semifinalka ayaa waxay dhex martay kooxaha Rochester iyo Somali Tigers oo ah kooxaha ugu culus, uguna adag gobolka Minnesota. Ciyaartan ayaad mooday inay labada kooxood isku awood dhawaayeen,  hase vyeeshee kooxda Somali Tigers ay ka faaidaysteen fursadihii ay heleen, halka kooxda Rochester ay iska qasaariyeen fursado badan aadna looga haystay maamulidda  dhexda, waxaana cayaartaasi ay ku soo gabagabowday 3 gool  iyo 0  oo dhabarka loo saariyay kooxda Rochester.

Ciyaartii Finalka ayaa habeenimadii xalay oo taariikhdu ahayd 4^th July, waxaa isku haleelay kooxaha  Sandiego iyo Somali Tigers oo iyagu xafiiltan hore uu ka dhaxeeyay maadaama sannadkii horena  2008 ay isugu soo baxeen cayaarta finaalka oo Sandiego laga adkaaday.. Cayaartan  oo dadweyne aad u faro badani ay ka soo qayb galeen  daawashadeeda  ayaad  ku bilaabatay weerar iyo weerar celis.

Qaybtii hore ee cayaarta ayaa cayaaryahankii No 99ad  u watay kooxda Somali Tigers oo galabtaasi ahaa xiddigga garoonka  waa  Faisal uu u dhaliyay  kooxda Somali Tigers goolkii ugu horreeyay , waxaana lagu kala nastay 1 & 0  oo ay guusha ku hoggaaminaysay kooxda Somali Tigers. Qaybtii 2aad ayaa ciyaartu ay si aad ah u sii kululaatay, Waxaana kooxda Somali Tigers ay heleen rigoore “Penalty”  taasoo isna uu u ansaxiyay Faisal. Kooxda Sandiego oo iyadu galabtaasi ka kasbaday reer Minnesota taageero xoogan oo sacab loo tumay dhawr jeer  ayaa iyadu weerar is dabajoog ah ku qaaday goolka kooxda Somali Tigers, waxaana daqiiqaddii 62aad  ay heleen goolkoodii ugu horreeyay oo uu u ansaxiyay ciyaaryahankii No 6aad u watay..Iyada oo kooxda sandiego ay aad u raadinayso barbarro ayaa rajadeedii waxaa quusiyay ciyaaryahan Qowdhan   oo goolkii 3aad halkaasi kooxdiisa ugu dhaliyay. Ciyaartiina waxaa ay ku soo gabagabowday 3 Gool  iyo 1 oo ay guushii ku raacday kooxda Somali Tigers oo iyadu  sannadkii 2aad noqotay horyaalka cayaaraha toddobaadka Soomaalida ee Minnesota.

Ka hor intaanan la cayarin ciyaarta Finalka, Waxaa ka horreeyay cayaar aad u xiiso badnayd oo dhex martay dhallintii cayaaraha ka cuslaatay  oo iyaguna soo bandhigay cayaar farsamadeedu sarreysay.

Dhanka Kubbadda Koleyga oo iyagu cayaarahoodu ay ka socdeen garoonka kubadda koleyga ee  Minnesota Internship Charter School “MNIC “ ayaa waxaa  ku tartamayay  dhallinyarada da’dooda ka hoosayso  15 jirrada iyo 18 jirrada . Dhanka 15 jirrada waxaa iskugu soo baxay ciyaartii Finalka Kooxaha  Lions iyo Dolphins ,waxaana 82 dhibcood ku adkaaday kooxda Lions ,halka kooxda Dolphins  ay ka keensadeen 77 dhibcood.

Dhanka 18 Jirrada Waxaa finalka isugu soo haray kooxaha Iftin  iyo Banaadir  waxaana 85 dhibcood ku adkaaday kooxda Banaadir, halka kooxda Iftin  ay ka keensadeen 82 dhibcood.

Xafladdii xiritaanka ee cayaaraha oo ka dhacday garoonka James Griffin Stadium,ayaa waxaa ka soo qaybgalay  dadweyne aad u faro badan iyo Madax ka socotay ururada bulshada ee Minnesota oo ay ka mid ahaayeen: Guddoomiyaha jaaliyadda Banaadiriga Maxamed Abuukar, Guddoomiyaha ururka haweenka, Somali Woman in Minnesota” SWIM” marwo Xaawo Faarax, Drs, Dahabo Cilmi oo iyadu halkaasi ka qaaday buraanburo cajiib ahaa oo ka hadlayay Isboortiga, Guddoomiyaha Ururka African Development  Center Mudane Xuseen Samatar Garabyare  , Macallimimiintii, Cayaartooydii , iyo Garsoorayaashii  kaalinta wayn ka soo qaatay horumarinta isboortiga Soomaaliyeed. Sidoo kale waxaa iyaguna madasha joogay Wakiilo  ka socday ururada  caawiyay tartanka  sida: UsBank, MN Care,Blue shield Blue Cross iyo University of Minnesota.

 Guddoomiyaha guddiga  Isboortiga ee gobolka Minnesota Cabdi Cali Macallin  ayaa  isagu ka warbixiyay dadaalka iyo juhdiga dheer  ee loo soo maray qabashada cayaarahan iyo  dhallinyarada isku xilqaantay inay abaabulaan tartamada cayaareed ee kala duwan ee lagu dhaqan celinayo caruurta Soomaaliyeed.

Guddoomiyuhu waxaa uu mahadnaq aad u ballaaran u soo jeediyay intii gacanta ka gaysatay barnaamijkani inuu taabo gal noqdo. Waxaana uu u hambalyeeyay  kooxihii ku guulaystay kaalimaha 1aad iyo 2aad  iyo dhammaanba kooxihii tartanka ka soo qaybgalay ee ka kala yimid meelaha kala duwan ee ka baxsan Minnesota.

Ugu dambayntii guddoomiyuhu waxaa uu kula dardaarmay Macallimiinta Kooxha kala duwan ee K/Cagta , Kubadda koleyga,iyo cayaaraha fudud in la soo saaro jiil cusub oo ka qayb gala cayaaraha caalamiga oo magaca Soomaaliyeed gaarsiiya Caalamka. Waxaana halkaasi lagu bixiyay Abaalmarinadii loogu talogalay kooxaha.

Waxaa iyaguna xusid mudan in  halkaasi lagu soo bandhigay cayaaraha  fudud oo ay ku tartamayeen dhallinyaro yaryar ,cayaaraha hiddaha iyo dhaqanka, Heeso iyo Madadaalo isboorti oo ay samaynayeen caruurta yaryar.

Sawiro faro badan kala soco