Kooxdii ugu horeeysay ee xul qaran ah ee laga aasaaso tartamada xagaaga ee ay Soomalidu qabtaan xilliyada kuleeylaha ah ayaa waxaa markii ugu horeeysay laga aasaasay cayaaraha xagaaga SEUKI 2007.

Kooxda oo ay isku soo duba rideen Gaduudow oo ka mid ah maamulka Sosyyd , macallin Axmed Baliile ( Abaliisha )oo hore uga tirsanaan jiray kooxdii Horseed ee dalkeenii haddana tababare u ah kooxda Holland,iyo Macallin Daahir Gacameey oo ahaan jiray xiddig u safta kooxda Muqdisho haddana tababara kooxda London Stars ayaa waxeey ka koobanaayeen ilaa 16 cayaartooy si loo bilaabo in cayaarahan xagaaga ee la qabto kuleeylaha looga helo cayaartooy laga faaiidaysan karo oo xitaa Qarankii dalkeenii hooyo wax u tari kara.

Xulidda cayaartooydan oo ay sanadkan ugu horeeyso ayaa waxaa laga dhigi doonaa joogto haddii allaha awoodda lihi ogolaado waxaana mustaqbalka la isku dayi doonaa in la hor mariyo qorshahan xulka.

Kooxdan ku cayaareysay magaca xulka Soomaliya ayaa waxeey cayaartan oo ay aad ugu gacan sareeysay waxeey 4-1 ku dhan kaga badisay kooxda Kista IF iyadoo waliba hal cayaartooy laga saaray kooxda Xulka Soomalida.

Fikirkan saliimka ah ee ka biloowday garoonka weyn ee Spånga IP ayaa waxaa lagu macneyn karaa  mid hormar u noqon kara Sportiga Soomaliya oo isagu la burburay qeybihii kale ee bulshada iyadoo laga dareemi karo guuldarada joogtada ah ee ku dhacda kooxda xulka qaranka Soomaliya ee badanaa laga soo xulo kooxihii aan sida u tayada badneeyn ee ka dhisan dalkii hooyo.

Cayaartan shalay oo ay daawanayeen dadweeyne aad u fara badan ayaa waxeey ku soo xusuusineysay xilliyadii barasamaadkii iyo garoonkii weeynaa ee Stadio Muqdisho oo ay wada cayaarayaan koox xul qaran ah iyo koox ajanabi ah.

Maanta oo ay bishu tahay 29 July ayaa waxaa dhici doonta cayaartii Finelka aheeyd iyadoo ay wada cayaari doonaan kooxaha Qaran iyo Olympic Denmark.

Labadan kooxood ayaa semi finelki waxeey ka soo kala badiyeen London Stars iyo Kooxda Xiddigaha Rågsved

Cabdi Cumar Afrax

Stockholm