Shir aad loo soo agaasimay loona soo qaabeeyey oo uu ururka SEUKI ku yeeshay xaafada Haarlisden ee magaalada London ayaa wuxuu u dhacay si aan horana loo arag horana loo maqal iyadoo uu shirkaana kulmiyey dhamaan bahweeynta Sportiga ee magaalada London iyo waliba agagaarkeeda.

Shirkan ayaa waxaa qabanqabaadiisa si wada jir ah uga qeyb qaatay xubnaha ka tirsan ururka SEUKI ee reer London iyo waliba kooxaha ka cayaaraha cayaaraha xagaaga ee degan magaalada London iyadoo uu guddigan qabanqaabada guddoomiye u ahaa Sheekh Mukhtaar Shuute ayna ka mid ahaayeen xubnahaas xafladdan quruxda badan soo agaasimay Maxamed Cali Weerow , Bile Cali Xamaal , Axmed Bile , Maxamed Khaliif , Daahir Gacameey , Cabdirisaaq Seef , Macallin Zakariya , Xarbi Cali , Xasan Dhuudhi.

Wafuuda ka kala soctay kooxaha iyo waliba guddiga SEUKI ayaa waxeey degnaayeen HotelIbis oo garabka ku haya Garoonka weyn ee caanka ah  ee Wembley balse tirada dadka lagu casuumay shirka oo aad u badneeyd aawgeed ayaa guddiga qabanqaabadu waxeey xafladda u wareejiyeen Restarung weyn oo ku taal xaafadda Heerlisden oo ku dhaw xaafadda Wembley.

Shirkan oo uu xiriirinayey wariyaha Barnaamijka Sportiga ee Telefishinka weyn ee Universal TV Mar Sola ayaa waxaa markii ugu horeeysay lagu furay aayadaha quraanka iyadoo ka dibna lagu soo dhaweeyey makirafonka shirgudoonka shirkan islamarkaana ahaa guddoomiyaha guddiga qabanqaabada shirka Sheekh Mukhtaar Shuute isagoo halkaana ku soo dhaweeyey dhamaan marti sharafta ka soo qeyb gashay shirkan oo ay u dhamaayeen odayaashii iyo cayaartooydii hore kuwooda ugu magaca dheeraa dalkeenii , soo dhaweeyntaa ka dib ayaa waxaa islamarkiiba la qeeybiyey cuno fudud oo ay shaqaalaha Ristrontiga weyn ee shirku ka dhacayey ugu talagaleen ilaa 100 ka martida ahaa ee lagu soo casuumay shirsanadeedkan SEUKI.

Markii cashadii fududeeyd iyo salaadii maqrib laga soo laabatay ayaa wariye Sola waxaa uu mar kale Mikrofonka ku soo dhaweeyey Guddoomiyaha ururka SEUKI Cabdi Cumar Afrax oo ka war bixiyey waxqabadkii ururka SEUKI intii uu dhisnaa iyo waxyaabaha uu mustaqbalka tiigsanayo ururku isagoo halkaana uga mahad celiyeye marti sharaftii ka soo qeyb gashay kulankan iyo waliba xubnihii sidan qaabeeysan u soo abaabulay.

Shirkan ayaa sidoo kale waxaa lagu dhameeystiray heshiis ay hore labada urur ee SEUKI iyo EuroSom ku kala saxiixdeen magaalada Leicester kaasoo ka koobnaa lix qodob oo qodab ka mid ah uu ahaa in la abuuro guddi farsamo oo ka socda labada urur si ay u soo xulaan cayaartooyda ka cayaarta labada tartan guddigaas oo haatan la magacaabay waxaana dhanka SEUKI u matalaya guddigaa 1- Sheekh Mukhtaar Shuute 2- Daahir Cusman Faarax ( Gacameey ) iyo Bile Cali Xamaal halka ururka EuroSom ay matalayaan 1- Macallin Bashiir Cabdi Daahir 2- Sabiriye Gaabow iyo 3 -Yuusuf Maxamed Cabdi.

Shirkan ayaa waxaa hadalo aad u qiireysan ka jeediyey halyeey Maxamed Ismaaciil Cali oo aad ku wada xasuusataan koxdii Horseed iyo xulka qaranka Soomaliya isagoo carabka ku dhuftay in dabka ka holcaya Sportiga magaalada Stockholm ay baasiin ku shubayaan dad tiro yar oo reer London ah isagoo aad ugu celceliyey in inta yar ee hormarka Sportiga hortaagan la iska qabto.

Waxaa sidoo kale hadalo wanaagsan halkaa ka soo jeediyey Guddoomiye ku xigeenka GOS Mudane Duran Axmed Faarax oo halkaa ka soo jeediyey hadalo guubaabo ah oo ku socda dhamaan bahda Sportiga dalkeena sidoo kale waxaa isna hadalo ku saabsan wada shaqeeynta labada urur ee SEUKI iyo EuroSom halkaa ka soo jeediyey Guddoomiyaha urur EuroSom Maxamed Diini waxaa kaloo halkaa hadalo qiimo leh ka soo jeediyey Macallin Shiino Guhaad , Yaasin Maxamed Bulsho , Baana Cali, Abdulqadir Xuseen Soomareey , Axmed Cilmi Faarax, Cabdulqadir Maxamed Farax Birirq ,  Shuceeyb Jumcaale Barre iyo Abuukar Cali.

Sidoo kale waxaa halkaa ka hadlay qaar ka mid ah hablihii Basketka dalkeenii oo ay goobjoog ka  ahaayeen Bakiin Maaxi , Diib Cabdi Jaamac , Shukri Dhalbaas , Miski Cumar ,Faadumo Cali iyo qaar kaloo badan o aan halkan ku soo koobi karin.

Xafladdan quruxda badan oo aad dhawaan ka daawan doontaan Universal TV ayaa waxaa lagu dhameeystiray qorituurkii sanadkan 2008 ka dhacaya magaalada Stockholm oo waliba sanadkan cayaaraha SEUKI ay u ciidayaan 10  guuradii cayaaraha xagaaga ka dhaca magaalada Stockholm maadaama uu fikirka qabashada cayaarahan lahaa halyeey Cawad Xasan oo ka tirsan ururka SEUKI iyo waliba qaar ka tirsan kooxaha ka cayaara cayaarah oo ka mid ahaa kuwii soo bilaabay ayaa wuxuu ururka SEUKI sanadkan si gaar ah u xusi doonaa 10 guurada cayaaraha xagaaga Stockholm.

Waxaa sidoo kale halkaa hadal gaaban ka soo jeediyey Guddoomiya kooxada Xiddigaha Rågsved oo ku hadlayeye magaca kooxaha maadama ay soo wakiisheen isagoo ka hadlay hormarka degdegga ah ee ay cayaarahan xagaaga SEUKI gaareen iyo sida ay hore ugu socdaan.

Shirkan ayaa waxaa goobjoog ka ahaa Xuseen Bissad oo ah nin Soomali ah kana tirsan dadka dunida ugu dhaadheer ayaa halkaa isaga wuxuu ka jeediyey hadalo gubaabo ah , sidoo kale waxaa xafladdan goob joog ka ahaa websiteyada kala ah Somali Sport iyo markacadey.net .

Ururka SEUKI ayaa wuxuu mahad ballaran u dirayaa dhamaan bahdii Sportiga ee ka soo qeybgashay shirkan gaar ahaan Bashiir Mursal , Mr Sola , Maxamed Buube iyo dhamaan inta gacanta ka geeysatay bilicsamida xafladdan.

Isku aadkii tartanka ayaa wuxuu noqday sida hoos ku xusan .

Group A

Irland

Leicester

Olympic Danmark

Xiddigaha Rågsved

Group B

Sokao Bergan

Sonpet (Fin)

Tillbrug (Holland)

London Star

Group C

Midnimo (Göte)

Ilamos

Qaran

Streatham

Gabagabadii shirkan ayaa waxaa hadal gaaban ka soo jeediye Cali Nuur Garaash oo ka tirsan odayaasha Sportiga magaalada Stockholm isagoo halkaa ka sheegay sida uu ula dhacay shirkan quruxda badan isla markaana wuxuu sheegay in qorituurku u u dhacay si cadaalada ah oo ay koox walba ku qanacsan tahay .

More Picturs click here ( Sawiro intaa ka badan si aad u daawato halkan riix )

Mohamed Sheikh Nuur
shikha114q@hotmail.com