Xalay fiidkii abaara 8:00 ayay kooxo ku hubeysan Bastoolada waxa ay toogasho ku
dileen marxuum la oran jiray C/raxmaan Xuseen Ottodheere oo ahaa guddoomiyihii
waaxda koowaad ee degmada Hodon ee magaalada Muqdisho, xilli uu fadhiyay meel
Farmashiye ah oo ku taala xaafada Siigaale.

Marxuumka ayaa toogashadiisa kadib, waxaa uu ku nafbaxay isla goobtii, iyadoo
meydkiisana laga qaaday halkaasi, waxaana marxuumka saaka lagu aasay isla degmadaasi
Hodon.

Maamulka sare ee degmada Hodon ayaa tacsi u diray qoyskii iyo eheladii uu ka
geeriyooday marxuumka iyagoo sheegay in kooxaha dilay ay yihiin kuwii dili jiray
mas'uuliyinta dowladda balse aan loo aaneyneynin cid kale, sida uu sheegay
guddoomiyaha degmada Hodon Mr. dhabeney.

Dhinaca kale, falal qaraxyo ah iyo Rasaas xoogan ayaa xalay ka kala dhacay qeybo ka
tirsan magaalada Muqdisho, gaar ahaana goobo ay degan yihiin ciidamo ka tirsan
dowladda iyo kuwa Itoobiyaanka, iyadoo xarumaha ay ka dhaceena ay ahaayeen xaruntii
hore ee gaashaadhigga oo ay degan yihiin ciidamo Itoobiyaan ah, iyo xarumo kale.

Lama soo sheegin qasaare ka soo gaaray weeraradaasi dadka rayidka ah wallow ay dhici
karto, waxayna weerarada xalay ahaayeen kuwo lagu fuliyay Bambooyin nooca gacanta
laga tuuro ah.

Garaad Salaad Xirsi

garaadcadde@hotmail.com