Iyadoo lagu guda jiro cayaarihii maalmahanba ka socday garoonka weyn ee Spånga Ip ayaa waxaa maanta is arkay kooxaha kala ah Ilamos iyo Sonpet (Fin) iyo waliba Xiddigaha Rågsved iyo Sokoa.

Cayaarrtii hore oo ay wada cayaarayeen kooxaha Ilamos iyo Sonpet ayaa waxeey ku bilaabatay cayaar aad u degan oo isku dheelitiran labada kooxoodna waxeey soo bandhigeen cayaar wanaag waliba marmarka qaar ayeey kooxda Sonpet waxeey isla helayeen jaanta iyagoo qeybtii hore ee cayaarta u muuqday ineey ka cayaar qurxanaayeen kooxda Ilamos.

Cayaartan ayaa waxeey natiijadeedii noqotay 5-0 ay Ilamos markii danbe ugu awood sheegatay kooxda Sonpet oo iyadu laba guuldaroo heeysata goolal badana laga dhaliyey.

Cayaartii labaad ayaa waxaa fooda is daray kooxda Xiddigaha Rågsved oo iyaduna hore badis u wadatay iyo kooxda Sokoa oo iyadana hore looga soo guuleeystay , cayaartan ayaa waxeey aheeyd cayaar miisaaman oo aysan labada koox wax awooda oo dheeri ah aysan u dhaxeeyn iyadoo kooxda xiddigaha ay gool ku hormartay daqiiqadihii ugu horeeyey ee cayaarta ayeey kooxda Sokoa waxeey isla markiiba iska soo guday goolkii , balse kooxda xiddigaha Rågsved ayaa laba gool oo kale dusha u saaray kooxda Sokoa.

Gabagabdii cayaarta ayaa waxaa ay ku dhamaatay 3-1 ay kooxda xiddigaha Rågsved ku sabarsiisay kooxda Sokoa.

Kooxaha Ilamos iyo xiddigaha Rågsved ayaa waxeey haatan heeystaan min lix dhibcood iyagoo u muuqada kuwa gruopkan A kasoo bixi doona balse waxaa aan xisaabta laga saari karin in kubaddu ay cadaan iyo madoow tahay.

Garoonka Spånga IP oo maalin walba ay dadweynuhu soo buux dhaafiyaan ayaa waxaa maanta marti ku ahaa odayaasha Sportiga Soomaliya magaca ku lahaa kuwaas oo uu ka mid yahay Nuur Xuseen ( Nuur Jeenyo ) , Macallin Giftin , Shiine Guhaad , Axmed Saalax Diinaash , Axmed Baliile ( Abaliisha ) .

Dhanka fanka waxaa garoonka u hagar baxayey Qaalid Cadaani Super Khalid oo ah fanaan aad looga jecel yahay dalkan Sweden iyo wadamada dariska la ahba.

Cabdi Cumar Afrax

Stockholm