Cayaarihii xagaaga SEUKI 2009 oo sanadkan lagu ballansanaa ineey biloowdaan 17 bishan July ayaa shalay si aan caadi aheeyn uga furmay garoonka weyn ee Spånga IP oo ku yaal magaalada Stockholm.

Cayaarahan oo sanadkan xiiso gaar ah leh maadama ay magaalada Stockholm ka dhaceeyso hal cayaar ka dib markii ay guddiyadii kala qaban jiray cayaaraha isku tanaasuleen isla markaana camireen hal garoon iyadoo reer Stockholm iyo waliba martida iyo cayaartoyduba aad ugu farxeen in ay cayaaruhu ka dhacayaan meel qura taasoo ay ka soo shaqeeyeen odayaal Sport oo uu ugu horeeyo Bashiir Cilmi Maxamed ( Bashiir Jeenyo ).

Cayaarahan ayaa shalay waxaa ka soo qeyb galay wafdi ka socda xiriirka kubadda cagta Jabuuti oo ay guddiga qabanqaabada SEUKI ku casuumeen ineey ka soo qeyb galaan cayaarahan kuwaasoo ka koobnaa Guddoomiyaha xiriirka kubadda cagta Jabuuti isla markaana ah guddoomiye ku xigeenka Cecafa mudane Xuseen Fadul Dabar iyo xoghayaha xiriirka kubadda cagta Jabuuti mudane Cali Kaamil Cali iyadoo sidoo kale cayaarahan uu ka soo qeybgalay guddoomiye ku xigeenka xiriirka Soomaliyeed ee kubadda cagta mudane Axmed Nuur Xasan Cabdulle oo isna sidoo kale marti u ah ururka SEUKI sidoo kale waxaa wafdiga cayaarahan lagu casuumay ka mid ahaa Gudoomiyaha ururka EuroSom mudane Maxamed Diini , waxaa kaloo joogay xoghayaha guddiga olympikada Soomaliya Mudane Cabdulahi Taranbi , Xubin Guddiga Olympikada Soomaliya Maxamed Muuse Jabroos , Odayaal  Sport oo kala ah Axmed Nuur (Seyga) , Bashiir Cilmi Maxamed (Bashiir Jeenyo) , Axmed Saalax (Diinaash) ,Abukar Cabdulle ( Dhabareey) Cabdiqani Caalin , Xamdi Sheekh ,Cabdulaahi Shaacir,Cabdulqadir Buuxe (Qalaafe), Gacal Jiroow, Cilmi Waabari ,Ganeey, Aabaliisha ,Bile Cali , Seef ,Mustafa Gabdhoow Cabdulaahi Maalin Shaaciye , Cagaweyne , Jacfar iyo marti fara badan waxaa kaloo halkaa joogay masuuliyiin ka socda xisbiyo iyo ururo sida Guddomiyaha ururka Xaawo Taako Marwo Sahra Barqadle ,Kerstin Gustavsson oo ka soctay degmada , waxaa kaloo halkaa ku sugnaa fanaaniin waaweyn oo ay ugu weeyneeyd Luul Jeeylaani oo halkaa hees aad u mac ka qaaday.

Waxaa ugu horeeyn hadalkii furay Guddoomiyaha ururweynaha SEUKI  Sheekh Mukhtaar Shuute Shariif isagoo halkaana ka ku soo dhaweeyey wafdiyada kala duwan ee ka soo qeyb galay cayaarahan isagoo sidoo kalena xusay saxiibadii kale ee cayaaraha qaban jiray uguna hambaleeyey sida xilkasnimada leh ee ay u tanaasuleen iyadoo ay halkaana ka hadleen Guddomiyaha xiriirka kubadda cagta Jabuuti Guddoomiye Xuseen Fadul iyo gudoomiye ku xigeenka xiriirka kubadda cagta Soomaliya mudane Axmed Nuur , guuddomiyaha EuroSom Maxamed Diini sidoo kale waxaa halkaa ka hadlay Cabdi qani Caalin , Bashiir Jeenyo , Seyga Ruushka ,Kerstin Gustavsson, Jonny Lind oo ah taliayaha Poliska degmada Järva iyo Guddoomiyaha ururka Xaawo taako Sahra Barqadle oo halkaa ka jeedisay hadal qiimo leh iyadoo sheegtay in loo baahan yahay in qabanqaabada cayaarahan ay ka qeyb qaataan dumarka Soomaliyeed waloow ay jiraan gabdho badan oo wax bartay isla markaana qaban kara hawshan sidoo kale Sahra  waxeey codsatay in sanadka danbe la arko gabar guddoomiye ka ah ururkan iyadoo sidoo kale balan qaaday ineey sida uu poliskuba ballan qaaday ineey hadiyad aan hadda la shaacin gudoonsiin doonto kooxda aadaabta ku guuleeysata .

Waxaa sidoo kale halkaa lagu soo bandhigay bandhig faneed iyadoo ay halkaana dadka maaweelineeysay fanaanadii weeyneey Luul Jeeylaani , Cabdi Fataax Legend , iyo Mr Jeeri iyadoo uu DJ u ahaa DJ Xasan Wuqooyi., waxaa sidoo kale halkaa wacyi ka soo jeediye culumo badan oo uu ugu horeeyo Sheekh Xuseen Faarax .

Cayaartii shalay ayaa waxaa wada cayaaray kooxaha Holland iyo kooxda Rinkeby Star iyadoo ay cayaartana aheeyd mid aad u adag dadkuna jecleeystay ayaa waxaa ay 1 - 0  guushu ku raacaday kooxdii ku cayaareeysay magaca Holland.

Dhanka saxaafadda ayaa waxaa halkaa shalay ku sugnaa wariyayaal ka kala socday TV yada lokalka ah iyo websiteyada sida TV Horseed , Waryaa TV , Soomaliweyn , Soomalida Maanta , iyo kuwo kale oo aan halkan ku soo koobi karin.

Waxaa xusid mudan in kooxaha qaar ay soo xirteen funaanado ay dadku ku xasuusanayeen allaha u naxariistee Axmed Ibraahim ( Romiario) oo ka mid ahaa cayaartooyda kooxda xiddigaha Rågsved oo sandkii tagay lagu dilay magaaladan Stockholm iyadoo ay koxahaasina wataan funaanado uu magaciisa ku qornaa.

Isku soo wada duubo cayaarihii SEUKI 2009 ayaa shalay waxeey u furmeen si aan haba yaraatee caadi aheeyn.