Cayaarihii xagaaga SEUKI 2007 ayaa shalay si rasmi ah uga furmay garoonka weyn ee Spånga IP iyadoo furitaanka cayaarahana ay marti ku ahaayeen siyaasiyiinta xaafadda Rinkeby oo uu ka socday Abeba Hayle iyo macalinkii hore ee kooxda qaranka kubadda koleyga dalkeenii Mr Shiino Guhaad , garsoore caalami ah Axmed Salax Diinaash , Abaliisha sidoo kale waxaa halkaa goob joog ahaa maamulka Dahabshiil / Sweden Mr Maxamuud iyo Axmed Aweys.

Waxaa barnaamijkii shalay xiriiriye ka ahaa Ciid Arsenal oo dadka garonka fadhiyey aad uga qoslinayey waxaana uu barnaamijku ku biloowday ayadaha Quraanka oo uu guddoomiyaha kooxda Xiddigaha Rågsved ka akhriyeyey halkaa ka dibna waxaa hadalkii lagu soo dhaweeyey Guddomiya guddiga qabanqaabada Mr Cali Sheekh ( Cali Gureey ) oo halkaa kooxaha iyo dadweynaha ka soo qeyb galayba ugu mahad celiyey gaar ahaana reer Stockholm oo ah dad Sportiga jecel isla markaana garoomada soo camira ka dib waxaa hadlay Axmed Diinaash oo kooxhaha iyo dadweynahaba hadal gaaban u jeediyey isagoo ku waaniyey in cayaaro wanagsan ay dhacaan labadan week ee inagu soo aadan, ka dib waxaa hadalkii qaatay Shiino Guhaad oo aad uga hadlay in midnimada Stockholm ay muhiim tahay sidoo kale waxaa halkaa ka hadlay Poliska Rinkeby oo isna sanadkan wada shaqeyn buuxda la leh guddiga maamulka SEUKI ugu danbeyna waxa dhowr kalmad halkaa ka jeediyey maamulaha Dahabshiil /Sweden Maxamud Ibrahim oo isna halkaa ka sheegay sida shirkaduu ay uga qeyb qaadatay hormarinta cayaaraha.

Waxaa ka dib bilaabmay bandhig faneed uu fanaanka weyn Super Khalid soo bandhigay iyadoo sidoo kalana halkaa ka heeseen fanaaniinta Jelle iyo Faarax.

Waxaa sidoo kale shalay Guddiga qabanqaabadu ay tartan u sameeyeen caruur da,ayar oo u qeybsamay ilaa shan group oo gabdho iyo wiilalba iskugu jiray iyadoo halkaana loogu qeybiyey hadiyado yaryar.

Shalayna ay cayaarta fureen kooxdii sanadkii hore koobka heeysatay ee Xiddigaha Rågsved iyo kooxda Sonpet ee dalka Finland .

Cayaartan ayeey kooxda xiddigaha Rågsved aad uga gacan sareeysay kooxda Sonpet iyagoo uga badiyey goolal xad dhaaf ah oo gaaray ilaa 10 gool. Waxaa xusid mudan in cayaaryahan Cabdi Walaalo oo nr 3 aad u qaata kooxda Xiddigaha uu 4 gool ku dhan ka dhaliyey cayaartan taasoo u sahleeysa tartanka goolasha oo uu sanadkii hore iyo sanadii ka horeeyaba hore u qaatay.

Cayaartii labaad ee shalay ayaa waxaa ay dhexmartay kooxda Sokoa oo ka soctay Norway iyo kooxda Ilamos oo ka soctay England , cayaartan ayaa aheeyd mid aad u adag iyadoo gool ay ku hor mareen kooxda Sokoa balse ay Ilamos goolkii iska soo gudeen ka dibna heleen laba gool oo kale .

Cayaartan ayaa aad u adkeyd waxaana runtii labada kooxood ka muuqatay caro aad u badan iyadoo koox walba ay doneysay ineey badiso waxaana xusid mudan in markii ugu horeeysay tartankan SEUKI uu shalay ka qeyb qaadanayey garsoorka garsoore Soomaaliyeed oo lagu magacaabo Maaweel iyadoo uu cayaartii koowaadna calanwale ahaa halka cayaarta labaadna uu ahaa garsooraha koowaad oo cayaarta garsoorayey.

Cayaartan labaad markii ay dhamaatay ayaa caradii labada kooxdood waxaa ka dhashay gacan ka hadal balse guddiga qabanqaabada ayaa ku guuleystay in uusan arintu faraha ka bixin waxeeyna ka soo saari doonaan go,aan adag si aysan mar kale u dhicin.

Dadweynaha ka soo qeyb galay cayaarahan shalay ayaa tiradoodu waxaa ay aheeyd xad dhaaf waxaana uu jawigu ahaa mid aad u qurxan waxaana maanta oo bishu atahay 15 July wada cayaari doona kooxda Stretham iyo Halgan cayaarta labaadna Midnimo (Göte) iyo Swiss.

Cabdi Cumar Afrax

Stockholm