Guddoomiye ku xigeenka Xiriirka Soomaaliyeed ee kubada cagta Axmed Nuur Cabdulle
ayaa shay booqasho ugu tagay cayaartoyda xulka qaranka kubada cagta Soomaaliyeed oo
u diyaar garoobaya cayaaraha qaramada bariga iyo bartamaha Afrika.

 
Guddoomiye ku xigeenka oo ay socdaalkiisa ku wehlinayeen masuuliyiin kale oo
isboorti ayaa kula dar daarmay cayaartoyda kubada cagta Soomaaliyeed in ay muujiyaan
karti iyo cayaar wanaag, isla markaana ku dadaalaan sidii macaga iyo sharafta
qaranka Soomaaliyeed ay kor ugu dhigi lahaayeen.

 
“Wax kasta oo aad mudneydeen ma aadan heli sababtuna waxaa ay tahay dhibaatooyinka
aadka u baahsan ee dalka ka jira, howsha aad qabaneysaana waa howl qaranka
Soomaaliyeed aad u heysaan taas ayaadna sumcad iyo sharaf weyn ku heleysaan”ayuu
guddoomiye ku xigeenku u sheegay cayaartoyda xulka qaranka oo uu ku booqday dugsiga
sare ee booliska oo ay bilihii lsoo dhaafay ku xareysnaayeen.

 
“Qiimaha iyo sharafta aad leedihiin waa wax aan muddo kooban looga sheekeyn Karin,
qof kasta oo Soomaali ahna marka uu maqlo magiciina runtii waxaa uu xusuustaa in
kaalin weyn oo muuqata aad dalka iyo dadka Soomaaliyeed ugu fadhisaan”ayuu
guddoomiye ku xigeenku ku yiri cayaartyda qaranka

 
Guddoomiye ku xigeenka ayaa cayaartoyda u jeediyay khudbad dheer oo dhiiri gelin iyo
amaan isugu jirtay waxaana dhamaan cayaartoydu ay aad ugu riyaaqeen sida qiirada
wadanimo ku dheehan tahay ee Mudane Axmed Nuur uu ula hadlay.
 
Xulka qaranka Soomaaliya ee kubada cagta ayaa barri oo Arboco ah u amba bixi doona
dalka Kenya halkaas oo ay kaga qeyb geli doonaan cayaaraha qaramada bariga iyo
bartamaha Afrika oo sanadkan Kenya ay marti gelineyso.
 
Somali NOC Media Department