1011281.html

Shirkadda Xawaaladda Sahal Express laanteeda Sweden oo heshay ogolaansho ay howsheeda ku fuliso

Shirkadda Xawaaladda Sahal Express oo waayadanba aheeyd shirkad la mataana ah Sportiga gacan weyna ka geeysata howlaha hormarinta Sportiga ee gudaha iyo dibadda ayaa waxaa dhawaan loo ogolaaday in ay howlaha xawaaladda si sharci ah u fulin karto.

Sahal Express ayaa waxeey ka mid aheeyd shirkadaha xawaaladaha Soomalida oo dhawaan ay dowladda Sweden ka mamnuucday ineey howlahaa xawaaladda ka fuliyaan dalkan Sweden taas oo dhibaato ku noqotay shirkadaha iyo waliba macaamiishii howlahaa loo qaban jiray , balse dadaal dheer oo ay shirkadu u gashay helitaanka ogolaanshahan ayeey ku guuleeysatay haatan ineey howlaheeda si sharci ah u qabsato.

Shirkadda xawaladda Sahal ayaa hadaba waxeey farxadda ogolaanshahan kaga jawaabeen ineey casuumaan bulshada Soomalida ah ee ay howlahan u qabato iyadoo casho sharaf aad loo soo agaasimay ku qabtay Jubba Restraung halkaasoo ay ka soo qeyb galeen qeybaha kala duwan ee bulshada Soomalida ku dhaqan Stockholm iyo nawaaxigeeda.

Ugu horeeyn waxaa xafladan lagu furay ayaadaha quraanka iyo wacdi gaaban oo daba socday kuna saabsanaa diinta waxa ay ka qabto beecmushtarka iyo ganacsiga iyadoo ka dibna Micraphone lagu wareejiyey Guddoomiyaha xawaaladda sahal Express qeybteeda Sweden mudane Maxamed Cabdi madoobe isagoo halkaa ka sheegay howlaha baaxadda leh ee ay xawaaladu qabato iyo sida ay uga qeybqaadato hormarinta bulshada hadeey noqon laheeyd Sportiga , abaaraha , taakuleeynta mashaariicda kala duwan.

Ka dib ayaa waxaa hadalkii qaatay Guddoomiyaha guud ee shirkadda xawaaladda Sahal Express mudane Badri Xayle Bariise oo isna ku dheeraaday waxqabadka xawaaladdan iyo sida ay bulshada ugu adeegto isagoo sheegay in maadaama aysan nidaam dowli ah oo canshuureed uusan haatan jirin in ay shirkadu taas dib ugu soo celiso shacabka Soomaliyeed iyagoo kaga qeybqaata hadba baahida jirta.

Waxaa halkaa sidoo kale ka hadlay shaqsiyaad matalayey bulshadii halkaa isugu timid iyadoo uu xaaji faarax u hadlay dhanka odayaasha Stockholm , dhanka Sportiga waxaa u hadlay Bashiir Jeenyo , dhanka aqoonyahanada waxaa halkaa u hadlay Maxamud Afgooye , dhanka oday dhaqameedyada waxaa u hadlay ugaas Axmed Sheekh.